हस्ताक्षर वळण….!
वसुधा वैभव नाईक धनकवडी जि.पुणे
हस्ताक्षर वळण….!
लहान मुल तीन वर्ष होत आलं की, त्याला आपण बाल वर्गात घालतो. इंग्लिश मीडियमला तो प्ले ग्राउंडला जातो. मराठी काय किंवा इंग्लिश काय हस्ताक्षर चांगले असलेच पाहिजे. अक्षराच्या वळनांकडे लक्ष दिलेच पाहिजे. यासाठी शिक्षक आणि घरातले पालक यांनी आपल्या मुलांकडे खूप लक्ष दिले पाहिजे. लेखनाला सुरुवात केली असतानाच मुलांच्या अक्षर वळणाकडे लक्ष दिले असता मुलांचे अक्षर खराब होणार नाही ही शंभर टक्के गॅरंटी आहे. अक्षरांची वळणे ठरलेली आहेत. त्याच अक्षर क्रमाने जर का तुम्ही विद्यार्थ्यांकडून अक्षर काढून घेतली तर निश्चित अक्षरांमध्ये, शब्दांमध्ये,वाक्यांमध्ये चुका होणार नाहीत. अक्षर वळणदार दिसेलच.
एक अक्षर आपण घेऊया..
उदा – आपल्याला क हे अक्षर काढायचे आहे. तर त्या कला प्रथम मध्ये एक उभी रेघ मारून घ्यावी. अ हे अक्षर घेऊया. अक्षर लिहिताना पहिली गोल अर्धीवाटी, त्याला जोडून दुसरी गोल अर्ध वाटी त्याच्या पोटामध्ये रेघ आणि त्याला जोडून एक उभी रेघ काढावी. जर मुलांनी तोच गोल उलटा काढला तर? किंवा अक्षर लिहिताना अक्षराच्या वळणाप्रमाणे नाही काढला तर? येथे मुलांचे अक्षर चुकते. या ठिकाणी शिक्षकांचे आणि पालकांचे लक्ष हवे. जर मुलांना ह्याच वळणाची सवय लागली तर शेवटपर्यंत मुलांना अक्षराचे वळण कळत नाही. मुलांचे अक्षर खराब होते.
आपल्या पहिलीच्या बालवर्गाच्या पुस्तकांमध्ये सुद्धा अक्षराची वळणे एक दोन तीन चार याप्रमाणे क्रमाने दिलेली असतात. अक्षर कसं वळवायचं हे दिलेलं असते. याचे निरीक्षण करून अक्षर गिरवायला मुलांना सांगावे. मग ते पाटीवर गिरवा. हवेत गिरवा. धूळ पाटीवर गिरवा. एखाद्या फलकावर गिरवा. पण हे अक्षर गिरवून,गिरवून तयार झाले पाहिजे. कोणीही मुलांना अक्षराचे वळण विचारले असता त्यांना ते सांगता आले पाहिजे. अशाच प्रकारे सर्व अक्षरांची वळणे आहेत. तेव्हा एकदा लक्षात आली की अक्षरांचे, शब्दांचे वळण चुकणार नाही. अक्षर सुबक आणि सुंदर दिसेल.
यासाठी आपण युट्युब वरून अक्षर लेखनाचा अभ्यास करावा. असे अनेक जण आहेत युट्युब वरती की जे अक्षरलेखन शिकवतात. त्यांच्या मार्गदर्शनाखाली आपण आपले अक्षर छान करू शकतो. शिवाय आपले शिक्षक आहेतच. आपले आई-बाबा आहेतच. तर मुलांनो लहान वयातच तुमचे अक्षर सुधारा. अक्षर वळणाकडे लक्ष द्या. शिक्षक आणि पालकांनाही नम्र विनंती आहे की, आपल्या पाल्याच्या अक्षर वळणाकडे लक्ष देऊन त्याचे अक्षर सुबक आणि सुंदर कसे होईल हे आपणच पहावे. आपल्या मुलांकडे आपणच लक्ष द्यावे. एकदा लहान वयात छान अक्षराची, वळणदार अक्षराची सवय लागली की ती आयुष्यभर अक्षर तशीच राहते. त्यामुळे थोडेसे कष्ट आपल्या मुलांवर आपणच घ्यावेत ही विनंती.
वसुधा वैभव नाईक
धनकवडी जि.पुणे
========
