“ती ध्येयवेडी ….कासवगती”; शर्मिला देशमुख
मंगळवारीय "आम्ही बालकवी" काव्यस्पर्धेचे परीक्षण
“ती ध्येयवेडी ….कासवगती”; शर्मीला देशमुख
मंगळवारीय “आम्ही बालकवी” काव्यस्पर्धेचे परीक्षण
जिंकण्याची आस.. सातत्याची कास
प्रयत्नांचा ध्यास… ध्येयासाठी त्रास
नको गतीचा हव्यास.. विजय हमखास
बालपणापासून ऐकत आलेलो आणि आवडणारी कथा “ससा आणि कासव” यांच्या शर्यतीची. एकदा ससा आणि कासव शर्यत लावतात. ससा पळत सुटतो..पुढे जाऊन कासव खूप मागे राहिल्याचे पाहून खातो, पितो ,थोडा आराम करतो आणि गाढ झोपी जातो. कासव मात्र न थांबता, न थकता चालत राहते आणि शर्यत जिंकते. आजही ही गोष्ट ऐकायला खूप छान वाटते. या कथेचे चालीवरील गाणे ‘ससा तो ससा की कापूस जसा त्याने कासवाशी पैज लावली’, ऐकताना आजही वय विसरून त्या कथेत लहान थोर तल्लीन होऊन जातात.
काळ बदलला, प्रसंग बदलले, विचार बदलले ,मूल्य बदलले, एकमेकांशी स्पर्धा करण्याऐवजी एकमेकांशी संधान बांधून दुसऱ्याची कमी तिथे आपले बल आणि आपली कमी तिथे दुसऱ्या चे बल वापरले, सर्वजण हातात हात घालून सोबत चालले तर लहान- मोठेपणा, श्रीमंत -गरीब ,हलके -भारी , असे प्रकार समाजात राहणार नाहीत. ही विचारसरणी पुढे येऊन मग याच कथेला पुढे कथा जोडण्यात आली. ससा परत कासवाकडे आला आणि कासवाला म्हणाला मित्रा, आता शर्यत नको, हारणे जिंकणे नको .जिथे जमीन असेल तिथे मी तुला पाठीवर घेणार आणि जिथे पाणी असेल तिथे तू मला पाठीवर घे. अशीच जीवनाची लढाई आपण जिंकू. यातून घ्यायचे काय तर..
आकाशाएवढी उंची ज्यांची त्यांनी थोडं खाली पहावं …
मातीमध्ये लोळतात जे त्यांना वरती उचलून घ्यावं…
‘मराठीचे शिलदार’ समूहाचे सर्वेसर्वा राहुल दादा नेहमीच समूहामध्ये चिंतनाचा विषय देत असतात. आजही मंगळवारीय “बालकाव्य स्पर्धा” यामध्ये त्यांनी असा चिंतनाचा विषय दिला. आमचे मराठीचे शिलेदार अशा विषयांना योग्य न्याय देत वेगवेगळ्या कल्पना करून कवितांचा बहर आणत असतात. आजचा विषय तसाच चिंतनाचा. “कासवगती” हा शब्द खरं म्हणजे कमी वेगासाठी वापरला जातो. पण या कमी वेगालात सातत्य दिले तर जीवनाची शर्यत नक्कीच जिंकली जाईल. त्यात एकमेकांची साथ मिळाली तर मग काय… हसते हसते कट जाए रस्ते… हो ना?
आज समूहात कासवगतीनेच का होईना पण काव्य बहरत गेले आणि कासवगतीला सशाचा वेग मिळाला. सर्व बालकाव्य शिलेदारांना, बालकवी मनाला पुढील लेखनासाठी भरभरून शुभेच्छा. राहुल दादांनी मला परीक्षण लेखनाची संधी दिली त्याबद्दल त्यांचे मनस्वी आभार… धन्यवाद!!!
शर्मिला देशमुख -घुमरे, बीड
सहप्रशासक\परीक्षक\ संकलक\लेखिका
©मराठीचे शिलेदार समूह
