जे एस. एम. महाविद्यालयात आंतरराष्ट्रीय योग दिन उत्साहात संपन्न
तुषार थळे, अलिबाग प्रतिनिधी
जे एस. एम. महाविद्यालयात आंतरराष्ट्रीय योग दिन उत्साहात संपन्न
तुषार थळे, अलिबाग प्रतिनिधी
बिनधास्त न्यूज वृत्तसेवा
अलिबाग (दि. २१): संयुक्त राष्ट्र संघाने निर्धारीत केल्यानुसार, वर्ष २०१५ पासून २१ जून रोजी आंतरराष्ट्रीय योग दिन संपूर्ण जगभरात साजरा केला जातो. या अनुषंगाने युवा व खेळ मंत्रालय भारत सरकार व मुंबई विद्यापीठ यांनी केलेल्या मार्गदर्शक सूचनानुसार जे. एस. एम. महाविद्यालयाचा ११ वा आंतरराष्ट्रीय योग दिन दि. २१ जून २०२५ रोजी सकाळी ठीक ७:३० वा. अलिबाग समुद्र किनारा येथे मोठ्या उत्साहात साजरा करण्यात आला. या कार्यक्रमासाठी महाविद्यालयाच्या प्राचार्या डॉ. सोनाली पाटील, एन. एस. एस. कार्यक्रम अधिकारी डॉ. प्रविण गायकवाड, प्रा. अश्विनी आठवले, जिमखाना समिती प्रमुख डॉ. रवींद्र चिखले, तसेच महाविद्यालयाचे प्राध्यापक, शिक्षक व शिक्षकेतर कर्मचारी, एन. एस. एस. स्वयंसेवक सहभागी झाले.
जनता शिक्षण मंडळाचे अध्यक्ष मा. ऍड गौतम पाटील यांनी आंतरराष्ट्रीय योग दिनानिमित्त सर्वांना शुभेच्छा दिल्या. या कार्यक्रमात योगाभ्यास व प्राणायामचे प्रात्यक्षिक दाखविण्यासाठी पतंजली योग समितीचे वरिष्ठ प्रशिक्षक श्री. गणेश वाघे, श्री गुरव व श्री रमाकांत राऊत योग प्रशिक्षक म्हणून उपस्थित होते.
सकाळी ७:३० वाजता आंतरराष्ट्रीय योग दिन कार्यक्रमाची सुरवात झाली. सर्व प्रथम उपस्थित पाहुण्यांचे शब्दसुमनांनी स्वागत केले. महाविद्यालयाच्या प्राचार्या डॉ. सोनाली पाटील यांनी सर्वांना आंतरराष्ट्रीय योग दिनाच्या शुभेच्छा दिल्या व सर्वांनी आपल्या उत्तम आरोग्यासाठी नियमितपणे योगाभ्यास व प्राणायाम करावेत असे आवाहन केले. त्यानंतर सामूहिक प्रार्थना घेऊन प्रत्यक्ष योगाभ्यसला सुरवात करण्यात आली.
योग प्रशिक्षक श्री गणेश वाघे, श्री रमाकांत राऊत व श्री गुरव यांनी उपस्थितांना वेगवेगळ्या ‘आसनांचा’ पद्धतशीर सराव करून दाखवला. “योगाभ्यास” दरम्यान, योग शिक्षक श्री. गणेश वाघे व श्री गुरव यांनी विविध “आसनांचा” उपयोग, अनेक रोग बरे करण्यासाठी आणि मानवाच्या सर्वांगीण कल्याणासाठी योगाची उपयुक्तता देखील सांगितली. योगाभ्यास दरम्यान वेगवेगळी आसने केली गेली ज्यामध्ये ताडासन, वृक्षासन, पद-हस्तासन, अर्धचक्रासन, त्रिकोनासन, भद्रासन, वज्रासन, उस्त्रासन, मकरासन, भुजंगासन, सालभासन, सेतुबंधासन, उत्तानपदासन, कपालभाती, भ्रमारिका व इतर प्राणायामाचे प्रकार यांचे प्रात्यक्षिके करून दाखवली व त्याचे आपल्या शरीर व मनाला होणारे फायदे स्पष्ट केले. कार्यक्रमाची सांगता सकाळी ठिक ९:०० वाजता झाली. सर्व सहभागींनी त्यांचे शरीर आणि मन निरोगी, तणावमुक्त आणि आनंदी राहण्यासाठी योगासन करत राहतील अशी शपथ घेतली. योगाभ्यासाचा नियमित सराव हा सर्वांना शारीरिक, मानसिक आणि आध्यात्मिक दृष्ट्याही चांगले जीवन प्राप्त करण्यास नक्कीच मदत करेल असा विश्वास उपस्थितांनी व्यक्त केला.
आंतरराष्ट्रीय योग दिन कार्यक्रमाचे नियोजन प्राचार्या डॉ. सोनाली पाटील यांच्या मार्गदर्शनाखाली एन. एस.एस. कार्यक्रम अधिकारी डॉ. प्रविण गायकवाड व प्रा. अश्विनी आठवले यांनी केले. कार्यक्रमाचे सूत्रसंचालन राष्ट्रीय सेवा योजना कार्यक्रम अधिकारी प्रा. अश्विनी आठवले यांनी केले तर आभार प्रदर्शन डॉ. प्रविण गायकवाड यांनी केले.
