वारी पंढरीची (अभंग लेखन)

वारी पंढरीची
(अभंग लेखन)

वारी पंढरीची | चुकू नये कधी|
नको आधी व्याधी | पांडुरंगा||१||

येता पंढरीसी | सुखावतो जीव |
तुजलागी कीव | येई माझी ||२||

गुंतलो संसारी | उरले न भान |
भूक नि तहान | शमेचीना ||३||

शेतीवाडी माझी | फुला फळा आली |
चिंता सारी गेली | क्षणार्धात ||४||

येताच आषाढी | पाऊले चालती |
मनी नसे भिती | तिळमात्र ||५||

होतोय मार्गस्थ | तुझ्या दर्शनासी |
आस या जीवासी | लागलीसे ||६||

टाळ माझ्या हाती | मुखी तुझे नाम |
नाहीच विश्राम | पावलांसी ||७||

जागर भक्तीचा | अखंड करीन |
वाट ही धरीन | पंढरीची ||८||

होईल संवाद | तुझा माझा देवा |
आनंदाचा ठेवा | मिळवीन ||९||

पांडुरंग एकनाथ घोलप
मु.पो रोहोकडी,ता.जुन्नर जि.पुणे

0 4 8 2 8 4