नवांकुर

नवांकुर

दाही दिशा दौडत, वळीवाचं मेघ गर्जत आलं
भेगाळल्या धरणीचं, निब्बर ढेकूळ मऊ झालं..//

लगभग बळीराजाची,मशागतीला हात लागलं
नांगरट कुळवट धांदल, रानाला रूप लाभलं..//

पावशा घू च्या स्वरानं, अवघं शिवार जागवलं
संकेत मृग रोहिणीचं,जणू मेघराजांनं कळवलं.. //

ओटी बांधून पोटाला, घरधनीनं भार सावरलं
सर्जा राजाच्या जोडीनं, धन्यानं सारं आवरलं.. //

कूरीवर मूठ रिती झाली, मातीत बी रूजवलं
आभाळमाया बरसली, नवं नवांकुर उगवलं ..//

हलकेच पोफडं सारून, कोवळं रोप डोकावलं
हिरवगार शिवार पाहून, बळीचं मन सुखावलं..//

फुटू लागलं एकेक पान, दान सत्पात्री पडलं
नवांकुराच्या पोटरीतच, सपान बळीचं दडलं.. //

विष्णू संकपाळ बजाजनगर
छ. संभाजीनगर
==============

0 4 8 2 8 4