खडाजंगी
झाली सुरु सकाळी सकाळी
खडाजंगी आई, बायकोची
सप्तसूर लागले दोघींचे
आदळआपट झाली भांड्यांची.
भांडण दोघींचे सुरु होता
दिवस माझा खराब जातो
काय बोलावं सुचत नाही
मूड माझा बिघडून जातो.
जुन्या पुराण्या गोष्टींवरुन
वादविवाद दोघी घालती
अवघड माझी परिस्थिती
गुंग होतसे माझी मती.
ही म्हणते दोन शब्द बोला
खडसावा तुमच्या आईला
आई म्हणे सांग दोन शब्द
तुझ्या कजाग बायकोला.
दोघींनाही खडसावण्याची
हिंमत मजला होत नाही
बायकोशिवाय झोपण्याची
सवय मला मुळीच नाही.
खूप मी विचार केला
मार्ग काढू यावर कसा
ठेवू कसा खुश दोघींना
मला सुचला उपाय खासा.
गुपचूप बोललो आईला
खोटं खोटं बोलतो तुला
मनात काही ठेवू नकोस
खुशी वाटेल माझ्या पत्नीला.
तेच सांगितले गुपचूप
कानात माझ्या बायकोच्या
तडातडा बोललो तिला
मोद जाहला माझ्या आईला.
सुखी झाल्या दोघीजणी
मी पण संतोष पावलो
दोघींच्या खडाजंगीतून
सहीसलामत मी सुटलो.
प्रवीण हरकारे
जि.अहिल्यानगर
