0
4
8
2
9
4
जगरहाटी
आले किती गेले किती, राजे महाराजे झाले
अनंत काळापासून अशीच, जगरहाटी चाले..//
शक्ति,भक्ति,युक्तीचा, प्रत्येकाचा अवीट ठसा
आदर्श कार्य कर्तृत्वाचा, इथे घ्यावा मूठ पसा.. //
चाळूनी पहावी पाने, इतिहासही देतोय नारा
छल,कपट,खल वृत्तीस, मुळीच देवू नये थारा..//
जगरहाटीचा दोर फिरवत, काळ चाले मस्तीत
भला बुरा फेरा त्याचा, येई आपल्याही वस्तीत.. //
मग जात्यातलं रडतय, आणि सुपातलं हसतय
ज्याच्या त्याच्या वेळेचं, गणित पक्कं असतय.. //
हा अटळ नियम सृष्टीचा, उत्पत्ती त्याचा र्हास
पर अभाव दिव्य दृष्टीचा, म्हणून सर्व अट्टाहास..//
येणे जाणे निश्चित, नकोय किंचितही खंत खेद
इथे निश्चिंत मनाने घ्यावा, अंती मृत्युचाही वेध..//
विष्णू संकपाळ बजाजनगर
छ.संभाजीनगर
=========
0
4
8
2
9
4
