जगणं सोडू नको !

जगणं सोडू नको !

निष्पर्ण झाड झाले तरी ही मुळं उखडू नको
जाईल वेळ ही पण, बस जगणं सोडू नको

शत्रू अति भयंकर चालून जरीही आला
फेकून शस्त्र आपले त्याच्या पाया पडू नको

जळल्या अनेक वस्ती वणव्यात आज येथे
तू पोळला जरासा म्हणून इतका रडू नको

आयुष्य माणसाचे एक असते सुरेल कविता
चुकले यमक थोडे म्हणून सगळं खोडू नको

निसटून दूर गेले काही धागे तुझ्या हातातून
तरी कापून नाळ आपुली तू एकटा पडू नको

जिंकशील तूच अंती हा खेळ जीवनाचा
फासेच उलटे पडले म्हणून डाव मोडू नको

जाईल वेळ ही पण…. बस जगणं सोडू नको…!

सुजित वाघमारे
चेरा, लातूर
=========

0 4 8 2 9 4