0
4
8
2
8
6
सांजवेळ..
ती सांजवेळ नि घरचा पकडलेला रस्ता
सोबतीला आठवणींचा तो पसारा
केशरी छटांची लेऊन चादर काहीशी
मनात शोधत होते मी तुझाच आसरा..
आकाशात उडणारी चिमणपाखरे
परतीला काहीसे दिसले आसूसलेले
घरट्यात पिल्लांची असेल चिवचिवाट
त्या ओढीने त्यांचे पंख जणू पसरलेले..
क्षितिजावर भास्कर काहीसा पिवळसर
परत जाण्याचे त्याचे दिसलेले संकेत
उद्याची प्रभा परत आणेन हि आशा
नविन दिवसाची सुरुवात हेच अभिप्रेत..
सांजवेळची ती हसरी जरा लाजरी संध्या
मनात तुझ्या भेटीची साद का घालते माझ्या
हातात हात तुझा घेऊन ती पाऊलवाट
आवडेल मलाही सोबतीने चालणे तुझ्या..
सौ.प्रज्ञा सवदत्ती
गोरेगाव -रायगड.
========
0
4
8
2
8
6
