सत्ता’मेव जयते

‘सत्ता’मेव जयते

सत्याचा ना सहिष्णुतेचा,विजय असे सत्तेचा
रणांगणी या शस्र नसे,तरी पाऊस जखमांचा..

ढोल वाजती फुटती फटाके,नभात ध्वजही फडके
माध्यमंही दरबारी विदूषक,रूबाब दाखवी हटके
मतदानाचा हक्क मात्र,नसे मत मांडण्याचा..
रणांगणी या शस्र नसे,तरी पाऊस जखमांचा..

हुशार भारी लोकशाही,मतपेटीतून बाहेर येई
पाच वर्षे मग फोटो सेशन,विश्रांती कामा देई
शपथेपुरता वापर फक्त,इथे संविधानाचा..
रणांगणी या शस्र नसे,तरी पाऊस जखमांचा..

असले कसले घोटाळे हे,किती करावी यादी
बुद्धीबळाच्या पटावरी या,माणूस बनतो प्यादी
राणी हलते राजा वाचतो,जीव जाई सामान्यांचा..
रणांगणी या शस्र नसे,तरी पाऊस जखमांचा..

ओरडणारा देशभक्त,आदर्श ठरे अपराधी
‘सत्ता’मेव जयते याची,जडली आहे व्याधी
टाळ्यांच्या गजरात दडपती,आवाज अन्यायाचा..
रणांगणी या शस्र नसे,तरी पाऊस जखमांचा..

सविता पाटील ठाकरे
सिलवासा

0 4 8 2 8 6