अन्यायाविरुद्ध लढणाऱ्या धाडसी ‘सिंधूताई नरुले’ या महिलेचा संघर्ष
गजानन ढाकुलकर, हिंगणा प्रतिनिधी
अन्यायाविरुद्ध लढणाऱ्या धाडसी ‘सिंधूताई नरुले’ या महिलेचा संघर्ष
‘सिंधूताईंना’ जागतिक महिला दिनाच्या शुभेच्छा
गजानन ढाकुलकर, हिंगणा प्रतिनिधी
बिनधास्त न्यूज नेटवर्क
नागपूर/ हिंगणा : (दि ८ मार्च) वानाडोंगरी येथील अशिक्षित व वयोवृद्ध महिला श्रीमती सिंधू रामकृष्ण नरुले यांनी अन्यायाविरुद्ध उभे राहत जिद्द, धैर्य आणि संघर्षाचे प्रेरणादायी उदाहरण समाजासमोर ठेवले आहे. सामान्यतः अशिक्षित आणि वयोवृद्ध महिलांना समाजातील अन्याय, फसवणूक किंवा जमीन बळकावण्याच्या प्रकारांपुढे हार मानावी लागते. मात्र सिंधूताई नरुले यांनी या सर्व परिस्थितीला न घाबरता, कोणत्याही लोकप्रतिनिधी, सामाजिक कार्यकर्ते किंवा शेजारच्या नागरिकांचे सहकार्य लाभले नसतानाही अन्यायाविरुद्ध आवाज उठवून धाडसाचे उदाहरण घालून दिले आहे.
माहितीनुसार, वानाडोंगरी नगर परिषद शहरातील प्रथम नगराध्यक्षा वर्षा शहाकार यांचे पती माजी सरपंच सतीश शहाकार व त्यांचे काका स्वर्गीय सेवकराम शहाकार यांनी त्यांच्या वडिलोपार्जित मालकीची जमीन बेकायदेशीररीत्या हडपल्याचा प्रकार घडल्याचे त्यांच्या लक्षात आले. त्या अशिक्षित असल्यामुळे हा प्रकार त्यांच्या निदर्शनास थोडा उशिरा आला. मात्र सत्य समोर आल्यानंतर त्यांनी भीती न बाळगता न्यायासाठी लढण्याचा ठाम निर्धार केला.
अत्यंत मर्यादित साधने, सामाजिक दबाव आणि राजकीय प्रभाव असतानाही त्यांनी पोलिस प्रशासनाकडे धाव घेतली. सातत्याने पाठपुरावा करून त्यांनी एमआयडीसी पोलिस स्टेशन, नागपूर शहर येथे भारतीय दंड संहिता कलम 420 अंतर्गत गुन्हा दाखल करण्याचे धाडस दाखवले. एका अशिक्षित वयोवृद्ध महिलेकडून असा संघर्ष उभा राहणे हे स्वतःमध्ये मोठे धैर्य आणि आत्मविश्वासाचे प्रतीक मानले जात आहे.
सिंधूताई नरुले यांचा हा संघर्ष केवळ त्यांच्या जमिनीपुरता मर्यादित नसून तो अन्यायाविरुद्ध उभे राहण्याचा संदेश देणारा आहे. समाजातील अनेक महिला अन्याय सहन करतात, परंतु सिंधूताई यांनी परिस्थितीशी झुंज देत न्याय मिळवण्यासाठी कायदेशीर मार्गाचा अवलंब केला. त्यामुळे त्या अनेक महिलांसाठी प्रेरणास्थान ठरत आहेत.
त्यांच्या या धाडसी भूमिकेची दखल घेत कर्मयोगी फाऊंडेशन, बुटीबोरी यांनी त्यांचा विशेष सन्मान करून त्यांच्या संघर्षाला सलाम केला आहे. आजही शहाकार गृह निर्माण सहकारी सोसायटी संदर्भात त्यांचा तालुका महसूल विभाग, नगर परिषद विभाग, पोलिस विभाग तसेच इतर प्रशासकीय विभागांमध्ये आणि न्यायालयात लढा सुरू असून त्या न्याय मिळेपर्यंत झुंज देत राहण्याच्या भूमिकेत ठाम आहेत.
दरम्यान, सिंधूताई नरुले यांनी हा संघर्ष सुरू केल्यानंतर गावातील नागरिकांमध्येही या प्रकरणाबाबत मोठी चर्चा झाली. स्थानिक स्तरावर शहाकार कुटुंबाच्या भूमिकेबाबत नाराजी व्यक्त होत असल्याचे बोलले जात आहे. गावातील अनेक नागरिकांनी त्यांच्यापासून अंतर ठेवले असल्याची चर्चा आहे. इतकेच नव्हे तर घरात माजी सरपंच व नगराध्यक्ष पद असूनही शहाकार कुटुंबाला पुढील स्थानिक निवडणुकांमध्ये अपेक्षित यश मिळाले नाही. सत्ताधारी पक्षाशी संबंध असूनही त्यांना नगरसेवक पदाची निवडणूक जिंकता आली नसल्याचेही स्थानिक राजकीय वर्तुळात बोलले जात आहे. तसेच या जमीन प्रकरणामुळे भविष्यात पक्ष स्तरावर त्यांना महत्त्वाची जबाबदारी देण्याबाबतही अनिश्चितता असल्याची चर्चा राजकीय पातळीवर सुरू आहे.
समाजातील महिलांनी अन्यायाविरुद्ध आवाज उठवून आपल्या हक्कांसाठी लढले पाहिजे, हा संदेश सिंधूताई नरुले यांच्या संघर्षातून मिळतो. अशा जिद्दी, धाडसी आणि प्रेरणादायी महिलेला जागतिक महिला दिनानिमित्त मनःपूर्वक शुभेच्छा देत त्यांच्या पुढील वाटचालीसाठी उत्तम आरोग्य, दीर्घायुष्य आणि यश लाभो, हीच सदिच्छा.
