ये श्रावणा
आषाढ परतीचा ईथे रचला आहे घाट..
ये रे ये श्रावणा आता तुझीच वाट. ||धृ||
हिरवाईचा चोपडा आचल,
वाट बघते वसुंधरा
आचलावर करायचं, नक्षीकाम दाट..
सुमनकुंचला घेऊन ये रे ये श्रावणा आता तुझीच वाट… ||१||
हिरवे हिरवे पाते डोलते
झुलते शेतशिवार सारा
त्या शेतांना हवी आता मोत्याची गाठ..
मोत्याचे दाणे घेऊन ये रे ये श्रावणा आता तुझीच वाट.. ||२||
राबून -राबून थकला
आता बळीराजा माझा
विश्रांतीला जोड, हवा गोडधोडाचा ताट.
सन-त्योहार घेऊन ये रे ये श्रावणा आता तुझीच वाट.. ||३||
सासुरवाशीण मनाला
लागली माहेरची आस
राखीची वाट पाहतो भावाचा हात
राखीचा सन घेऊन ये रे ये श्रावणा आता तुझीच वाट.. ||४||
बळीराजाच्या संगतीत राबतो
ढवळ्यापवळ्या दिनरात
त्यालाही मिरवू दे एकदिसाचा थाट
सन पोळ्याचा घेऊन ये रे ये श्रावणा आता तुझीच वाट.. ||५||
कुठे बरसला धो-धो तो
कुठे कोरडा दुष्काळ
त्या पावसाला दे आता लगामधाट..
रिमझिम सरी घेऊन ये रे ये श्रावणा आता तुझीच वाट.. ||६|
वनिता गभणे
आसगाव जि.भंडारा
