“आधारवड भाऊजी, हृदयाला स्पर्श करणाऱ्या आठवणी”
डॉ. ज्ञानेश्वर माशाळकर उमरगा, जि. धाराशिव
“आधारवड भाऊजी, हृदयाला स्पर्श करणाऱ्या आठवणी”
जीवनाच्या प्रवासात काही नाती अशी भेटतात की, ती फक्त नाती राहत नाहीत, तर आयुष्याचा आधार बनतात. ‘माझ्या आयुष्यात माझे आदरणीय भाऊजी असेच एक आधारवड आहेत’. आमच्या घरावर काळाने खूप कठीण प्रसंग आणले. बहिणीचे लग्न झाले, पण त्या आनंदाच्या क्षणांमध्येच आमच्या डोक्यावरची आईची मायेची सावली कायमची हरपली. आई गेल्यानंतर घर जणू ओसाड झाले होते. तिच्या मायेचा हात, तिच्या शब्दांचा आधार आणि तिच्या उपस्थितीची ऊब, सगळं काही एकदम दूर गेलं होतं.
त्या दुःखातून अजून सावरतही नव्हतो, तोपर्यंत काही काळातच आमचे वडीलही आम्हाला सोडून गेले. त्या दिवशी आयुष्य जणू अनाथ झाल्यासारखं वाटलं. घरात दुःखाची शांतता, मनात भविष्याची चिंता आणि डोळ्यांत अनेक प्रश्न होते.
घरची परिस्थिती खूपच हलाखीची होती. माझा पगार फक्त तीनशे रुपये. त्या तीनशे रुपयांत घर चालवणे म्हणजे जणू समुद्राला मुठीत धरायचा प्रयत्न. पण त्या अंधाऱ्या दिवसांत देवाने आमच्या आयुष्यात एक प्रकाश दिला. माझे भाऊजी. माझी बहीण अत्यंत हुशार आणि कष्टाळू होती. तिने बी.एस्सी., बी.एड. करून उच्च शिक्षण घेतले होते. तिच्या त्या स्वप्नांना पंख देणारा, तिला साथ देणारा आणि आमच्या संपूर्ण कुटुंबाला आधार देणारा माणूस म्हणजे माझे भाऊजी. त्यांनी कधीही आम्हाला परके समजले नाही. उलट आई-वडिलांची उणीव जाणवू नये, म्हणून त्यांनी आपल्या मायेच्या सावलीत आम्हाला जपले. कठीण काळात धीर दिला, संकटात मार्ग दाखवला आणि आमच्या आयुष्याला उभारी दिली.
भाऊजींच्या प्रेमात कधीही दिखावा नव्हता. त्यात होती ती फक्त निस्वार्थ माया, माणुसकी आणि आपुलकी. म्हणूनच आजही मन म्हणते, “ते फक्त बहिणीचे पती नाहीत, ते आमच्या आयुष्याचे आधारवड आहेत”. आज जेव्हा त्या दिवसांची आठवण येते, तेव्हा नकळत डोळे पाणावतात. कारण त्या अंधाऱ्या काळात जर भाऊजींसारखा माणूस आमच्या सोबत नसता, तर कदाचित आयुष्याची वाट इतकी धैर्याने पार करता आली नसती. आज त्यांच्या वाढदिवसानिमित्त मन भरून एकच भावना व्यक्त करावीशी वाटते. भाऊजी, आपण आमच्या आयुष्यात आहात, हीच आमच्यासाठी देवाने दिलेली सर्वात मोठी भेट आहे. ईश्वरचरणी मनापासून प्रार्थना, “आपले आयुष्य दीर्घ, निरोगी, आनंदी आणि समाधानाने भरलेले राहो. आपली माया आणि मार्गदर्शन आम्हाला आयुष्यभर असेच लाभत राहो.
डॉ. ज्ञानेश्वर माशाळकर
उमरगा, जि. धाराशिव
=======
