कवितादेश-विदेशनागपूरमहाराष्ट्रविदर्भसाहित्यगंध
वैष्णवांचा मेळा; नीला पाटणकर
0
4
8
2
9
7
वैष्णवांचा मेळा
वैष्णवांचा मेळा । जमला पंढरी ।
उभा विटेवरी । पांडुरंग ॥१॥
चिपळ्या मृदुंग । टाळ तालावर ।
नामाचा गजर । माऊलीचा ॥२॥
विश्वाचा भार l झेलतो श्रीहरी ।
संकटात तारी । भक्तगणां ॥३॥
चंद्रभागा काठी । मिळे समाधान ।
भक्तीत तल्लीन । वारकरी ॥४॥
विठ्ठल मायाळु । भक्तांवरी जीव ।
मनी नसे हाव । विठुराया ॥५॥
अंतरात वास । वसे चराचरी ।
पंढरीची वारी । अंतरात्मा ॥६॥
भक्ता मनी राही । विठ्ठल अखंड ।
नाही कधी खंड । हृदयात ॥७॥
स्वरूप भाबड । शांती मना देई ।
गुणगाण गाई । भक्तकरी ॥८॥
माऊली दर्शना । येती सारे गण ।
तोच त्यांचा सण l विठुवारी ॥९॥
भक्तीरस मनी । भक्तीचिया कास ।
लागलिया आस । भक्तांचिया ॥१०॥
वैष्णवांचा मेळा । तया दारी गोळा ।
विठुहरी भोळा । मनोमनी ॥११॥
श्रीमती नीला पाटणकर,शिकागो
===========
0
4
8
2
9
7
