“छत्रपती शिवाजी महाराजांच्या अपमानाचा व छत्रपती संभाजी महाराजांच्या खुनाचा बदला महार जातीने घेतला”; डी. के. साखरे
तालुका प्रतिनिधी
“छत्रपती शिवाजी महाराजांच्या अपमानाचा व छत्रपती संभाजी महाराजांच्या खुनाचा बदला महार जातीने घेतला”; डी. के. साखरे
तालुका प्रतिनिधी
मंगळवेढा : छत्रपती शिवाजी महाराजांच्या अपमानाचा व छत्रपती संभाजी महाराजांच्या खुनाचा बदला महार जातीने घेतला असल्याचे प्रतिपादन दलित अत्याचार विरोधी कृती समितीचे संस्थापक अध्यक्ष डी. के. साखरे यांनी केले.बुधवार दिनांक 25 डिसेंबर 2024 रोजी मंगळवेढा येथील श्री. संत चोखामेळा चौकात मनुस्मृती दहन दिवस साजरा करण्यात आला त्यावेळी साखरे बोलत होते.
यावेळी वंचित बहुजन आघाडीचे मंगळवेढा शहराध्यक्ष अजय गाडे व बहुजन सत्यशोधक बांधकाम कामगार संघटनेचे सोलापूर जिल्हाध्यक्ष प्रदीप परकाळे यांची प्रमुख उपस्थिती होती.सर्वप्रथम भीम सैनिकांच्या डॅशिंग नेत्या पद्मिनी शेवडे यांच्या हस्ते श्री. संत चोखामेळा यांच्या समाधीला पुष्पचक्र अर्पण करून कार्यक्रमाची सुरवात करण्यात आली.पुढे बोलताना साखरे म्हणाले की, ज्या मनुस्मृतीने शिवरायांचा राज्याभिषेक नाकारला, विषमतेचा पुरस्कार केला तसेच स्त्रियांना स्वातंत्र्य नाकारले त्या मनुस्मृतीचे डॉ. बाबासाहेब आंबेडकर यांनी दि. 25 डिसेंबर 1927 रोजी रायगडाच्या पायथ्याशी दहन केले. तेव्हापासून हा दिवस संपूर्ण भारतात मनुस्मृती दहन दिन म्हणून साजरा केला जातो.
यावेळी बहुजन सत्यशोधक बांधकाम कामगार संघटनेचे सोलापूर जिल्हाध्यक्ष प्रदीप परकाळे म्हणाले की, डॉ. बाबासाहेब आंबेडकर म्हणजे विषमतेविरुद्ध पुकारलेले बंड असून जिवंत आंबेडकरांपेक्षा आज प्रस्थापित मेलेल्या आंबेडकरांनाचं जास्त घाबरतात.तर वंचित बहुजन आघाडीचे अजय गाडे आपल्या भाषणात म्हणाले की, डॉ. बाबासाहेब आंबेडकर यांच्या कार्याला जगात तोड नसून मनुवादी प्रवृतीचे समूळ उच्चाटन करणे आवश्यक आहे.
यावेळी विजय शिकतोडे, समाधान भोसले, सुनिल शेंबडे, ब्रम्हदेव वाघमारे,संदेश लोखंडे, विकास जावळे,नितीन लोकरे, श्रीपती लोकरे, नितीन शेंबडे, नंदू लांडगे,बाबा घनवजिर यांच्यासह मोठया संख्येने पदाधिकारी व कार्यकर्ते उपस्थित होते. यावेळी मंगळवेढा पोलीस ठाण्याचे पोलीस निरीक्षक महेश ढवाण यांच्या मार्गदर्शनाखाली चोख पोलीस बंदोबस्त ठेवण्यात आला होता.
