सिर्सी येथे ‘शिव महापुराण कथा’ व ‘महाप्रसाद’ सोहळा उत्साहात संपन्न
प्रतिनिधी, अखिल रोडे
सिर्सी येथे ‘शिव महापुराण कथा’ व ‘महाप्रसाद’ सोहळा उत्साहात संपन्न
कला पथकाचे सर्वत्र कौतुक
प्रतिनिधी, अखिल रोडे
बिनधास्त न्यूज नेटवर्क
सिरसी (ता. उमरेड): परमहंस श्री संत रंगनाथ बाबा यांच्या पुण्यस्मरणोत्सवा निमित्त आयोजित ‘शिव महापुराण कथा सप्ताह’ व ‘संगीतयम ज्ञानयज्ञ सोहळा’ नुकताच मोठ्या उत्साहात आणि भक्तिमय वातावरणात संपन्न झाला. या कार्यक्रमाची सांगता सोमवारी भव्य महाप्रसादाने करण्यात आली, ज्याचा लाभ हजारो भाविकांनी घेतला.
*कला पथकाचे विशेष आकर्षण*
या संपूर्ण सोहळ्यात ‘राधे-राधे कला मंडळ, सासरा (सानगडी)’ यांच्या वतीने सादर करण्यात आलेल्या ‘कृतीमय बोलकी झाकी’ने सर्वांचे लक्ष वेधून घेतले. कलाकारांनी सादर केलेल्या जिवंत देखाव्यांचे आणि कलेचे उपस्थितांकडून भरभरून कौतुक करण्यात आले. अतुल नारनवरे , संजय डुंभरे , खेमराज गायधने, आंनद वैद्य, प्रफुल वासनिक , विदेश बोरकर, गोपाल गोटेफोडे, रामाजी राऊत, जगदीश पोहनकर, युगांत गोटेफोडे मयूर घरत, पराग उप्रिकर, नयन आखडे आणि त्यांच्या सहकाऱ्यांनी सादर केलेली ही कला या सोहळ्याचे मुख्य आकर्षण ठरली.
*गब्बरचा मेला आणि मनोरंजनाची पर्वणी*
या यात्रेमध्ये लहान मुलांसाठी विविध पाळणे, खेळणी आणि मनोरंजनाचे स्टॉल्स लावण्यात आले होते. विशेषतः ‘गब्बर का मेला’ हे प्रदर्शन आणि झुलणारे पाळणे पाहण्यासाठी बच्चेकंपनीसह मोठ्यांनीही गर्दी केली होती.
*लोकसहभागातून सोहळा यशस्वी*
ह.भ.प. नरेशजी महाराज निंबेकर यांच्या रसाळ वाणीतून शिव महापुराण कथेचे श्रवण करण्यासाठी पंचक्रोशीतील नागरिक मोठ्या संख्येने उपस्थित होते. हा कार्यक्रम यशस्वी करण्यासाठी गावातील नेते, सामाजिक कार्यकर्ते आणि समस्त सिरसीवासी गावकऱ्यांनी मोलाचे सहकार्य केले. प्रत्येकाने श्रमदान आणि आर्थिक स्वरूपात हातभार लावल्यामुळेच हा भव्य सोहळा शिस्तबद्ध पद्धतीने पार पडला.
*पोलिस प्रशासनाचा कडक बंदोबस्त*
या भव्य यात्रेदरम्यान कोणतीही अनुचित घटना घडू नये यासाठी ठाणेदार उमेश नासारे यांच्या मार्गदर्शनाखाली चोख पोलीस बंदोबस्त ठेवण्यात आला होता. पोलीस उपनिरीक्षक खंडेराव बोडगिर यांच्यासह असलम नवरागाबांदे, अमोल कोटेवार, निलेश बिजवाड, ओम राठोड, राजेंद्र रंगारी आणि सोनु चटप यांच्या संपूर्ण टीमने अहोरात्र परिश्रम घेऊन कडक बंदोबस्त राखला. पोलिसांच्या या सतर्कतेमुळेच हजारो भाविकांची उपस्थिती असलेला हा सोहळा शांततेत आणि शिस्तबद्ध पद्धतीने पार पडला.
