सिर्सी येथे ‘मानव धर्म’ सेवक संमेलन उत्साहात संपन्न
उमरेड सिर्सी प्रतिनिधी: अखिल रोडे
सिर्सी येथे ‘मानव धर्म’ सेवक संमेलन उत्साहात संपन्न
हजारो सेवकांची उपस्थिती
रवींद्रजी गायधने यांनी दिला नीतिमत्तेचा संदेश
उमरेड सिर्सी प्रतिनिधी: अखिल रोडे
बिनधास्त न्यूज नेटवर्क
नागपूर/ सिर्सी: (दि ११) येथील उमरेड-हिंगणघाट मार्गावरील नवीन वस्तीच्या भव्य पटांगणात परमपूज्य परमात्मा एक सेवक मंडळ, नागपूर अंतर्गत आयोजित भव्य सेवक संमेलन नुकतेच मोठ्या उत्साहात पार पडले. महानत्यागी बाबा जुमदेवजी यांच्या विचारांचा वारसा पुढे नेण्यासाठी आणि व्यसनमुक्तीचा संदेश देण्यासाठी आयोजित या संमेलनाला सिर्सी परिसरातील हजारो सेवक-सेविकांनी हजेरी लावली होती.
*शोभायात्रेने वेधले लक्ष*
कार्यक्रमाची सुरुवात सकाळी सामूहिक हवन कार्याने झाली. त्यानंतर मा. श्री. मनोहरजी झाडे यांच्या निवासस्थानापासून भव्य शोभायात्रा काढण्यात आली. ‘परमात्मा एक’चा जयघोष आणि भजनांच्या सुरांनी संपूर्ण सिर्सी परिसर दुमदुमून गेला होता. दुपारी १२:३० वाजता मान्यवरांच्या हस्ते दीप प्रज्वलन करून संमेलनाचे रीतसर उद्घाटन करण्यात आले.
*मान्यवरांचे मार्गदर्शन*
कार्यक्रमाचे अध्यक्ष मा. श्री. रविंद्रजी गायधने यांनी बाबा जुमदेवजींच्या शिकवणीचे महत्त्व विशद केले. याप्रसंगी प्रमुख पाहुणे म्हणून माजी मंत्री मा. श्री. राजेंद्रभाऊ मुळक यांची उपस्थिती होती. बेला पोलिस ठाणेदार मा.श्री. योगेश नासरे , समाजसेवक मा.श्री. मुकेश भाऊ झाडे उपस्थित मान्यवरांनी आपल्या भाषणात मानवी जीवनातील अंधश्रद्धा निर्मूलन आणि नीतिमत्तेचे महत्त्व अधोरेखित केले.
*दिवसभर वैचारिक मंथन*
दुपारच्या सत्रात बाबा जुमदेवजी यांच्या ‘मानव धर्म’ विषयावर विशेष चर्चासत्र आयोजित करण्यात आले होते. यामध्ये मानवाने भगवत प्राप्तीसाठी निष्काम भावनेने कसे जगावे, यावर मार्गदर्शन करण्यात आले. सायंकाळी ‘मानवधर्म भगवत जागरण’ या सांस्कृतिक कार्यक्रमाने संमेलनाची सांगता झाली.
*नियोजनबद्ध आयोजन*
कार्यक्रमाच्या यशस्वीतेसाठी मार्गदर्शक मा. श्री. मनोहरजी झाडे, श्री किसनाजी कामडी , श्री प्रकाश भुरे सिर्सी पदाधिकारी, तसेच उमरेड आणि हिंगणघाट शाखेच्या कार्यकारिणी सदस्यांनी विशेष परिश्रम घेतले. आलेल्या सर्व भाविकांसाठी महाप्रसादाचे उत्तम नियोजन करण्यात आले होते. शिस्तबद्धता आणि भक्तीमय वातावरणामुळे हे संमेलन परिसरात चर्चेचा विषय ठरले आहे.
