0
4
8
2
9
3
खबरदारी
गर्द दाट वृक्ष कुठंच दिसेना
मिळेना आता थंडगार छाया
भर उन्हात चालणाऱ्याला
मिळेना वृक्षांची आता माया…
उन्हाळ्यात सुद्धा नद्या नाले
पूर्वी तुडुंब भरलेले दिसायचे
उन्हाच्या काहिलीने जनावरे
मनसोक्त पाण्यात बसायचे…
जंगल दिसतंय चित्रात फक्त
डोंगर उघडा बोडखा झाला
आंब्याच्या पानाआड कोकिळ
आवाज कुहूकुहू नाही राहिला…
बगळ्यांची शाळा बंद पडून
दिसेना करकोचाचा तो थवा
पर्यावरण ऱ्हास आतातरी
मानवा तू थांबवायला हवा….
वृक्षारोपण नि संवर्धनाची
सर्व मिळून घेऊ खबरदारी
ठेवू श्वास मोकळा निसर्गाचा
निसर्गाची होईल पूजा खरी…
राजश्री मिसाळ ढाकणे
ता.जि.बीड
=======
0
4
8
2
9
3
