झडत्या

झडत्या

पोळा रे पोळा
यंदाही आला पोळा
दोनचार बैलजोड्या घेऊन
गावकरी झाले गोळा
एक नमन गौरा पार्वती
बोला हरहर महादेव ॥

बियाण्यांचे भाव गगनाला भिडले
पिवळ्या सोन्याचे दरही कडाडले
कर्जाने शेतकऱ्याचे कातडे काढले
कास्तकाराच्या मालाचे भाव नाही वाढले
एक नमन गौरा पार्वती
बोला हरहर महादेव ॥

काढा रे काढा
लबाडांची धिंड काढा
निवडून दिले तरी
सातबारा नाही केला कोरा
एक नमनगौरा पार्वती
बोला हरहर महादेव ॥

पोळ्याला गावाकडे’ जायची मोठी खुशी
रस्त्याची दैना जशीच्या तशी
चिखलात पाय गुडघाभर फसे
कमालच लोकांची राहतात कसे
एक नमन गौरा पार्वती
बोला हरहर महादेव ॥

जंगल तोडून उभारे कारखाने किती
प्रदुषणाची मनात बाळगा थोडी भिती
मायच्या नावानं झाडे लावण्याची निती
खुर्चीतले कावळे टाकूवरलं लोणी खाती
एक नमन गौरा पार्वती
बोला हरहर महादेव ॥

सरला टाले
राळेगाव यवतमाळ
==========

0 4 8 2 8 4