0
4
8
2
9
3
आरसा बोलला माझ्याशी
आरसा बोलला माझ्याशी
तू आहे तसाच दिसणार
किती वेळा बारकाईने
न्याहाळून स्वतःस पाहणार?
सत्य लपेना माझ्यापासून
कितीही केलास आटापिटा
दिसतोस रूबाबदार जरी
मला ना फायदा ना तोटा
चेहर्यावरच्या रेषा तुझ्या
गुज मनीचे हे खोलतात
अंतरंगातील भाव सारे
डोळे तुझेच रे बोलतात
खऱ्या खोट्याचा हिशोब
मी प्रामाणिकपणे करतो
तुझे व्यक्तिमत्त्व तुलाच
जसे आहे तसे दाखवतो
लबाडी चालत नाही मला
काच आहे माझी निर्मळ
फुलासमान निष्कलंक मी
जरी नसेल सुगंध दरवळ
मी आरसा तुझ्या मनाचा
देतो साक्ष तुला स्वत्वाची
करून देतो जाणीव तुला
तुझ्या खऱ्या अस्तित्वाची
सांगेन तुला एकच पामरा
सत्कर्म सदा करीत रहा
खुलून दिसेल व्यक्तिमत्त्व तुझे
मग आरशात डोकावून पहा
पांडुरंग एकनाथ घोलप
ता.जुन्नर, जि.पुणे
==============
0
4
8
2
9
3
