थेंब पहिला; विष्णू संकपाळ
थेंब पहिला
थेंब पहिला वहिला
जणू परिसाचा स्पर्श
सोनै व्हावे या देहाचे
मन मयूराला हर्ष.. //
थेंबा थेंबाची रे जादू
देही कस्तुरीचा गंध
मन होई रे बेकाबू.
सारा आसमंत धुंद… //
मिळे अमृताचे दान
दूर झाली मरगळ
भरे रोमात श्वासात
चैतन्याची. दरवळ.. //
ओढ म्हणू की हे वेड
गोडी तुलाही लागली
धार थेंबाची जाहली
माझी तहान भागली.. //
तुझे दृढ अलिंगन
बीज रूजे उदरात
युगा युगाचे मिलन
दिसा मासाने भरात.. //
बाप बळीराजा हौसी
सारे पुरवी डोहाळे
ध्यानी मनी जपे स्वप्नी
पाही सुखाचे सोहळे.. //
साज श्रावण सुखाचा
अंगोपांगी बहरला
लाज लाजूनी मी चूर
देह सारा मोहरला.. //
गर्द शृंगार हिरवा
शालू चोळी चूडा हाती
गीत मायबाप माझे
सुख समृद्धिचे गाती.. //
काळजाच्या काळजीने
मला जपे अहोरात
दृष्ट लागो ना सुखाला
जोडे देवाजीला हात… //
सुखरूप होवो मुक्ती
पोटी येवो हिरे मोती
बाप जगाचा पोशिंदा
त्याची भरावी रे पोती.. //
विष्णू संकपाळ
बजाजनगर छ. संभाजीनगर
============
