गुरुंचा सन्मान अन् करिअरची नवी दिशा; ॲड. दत्ता पाटील कॉलेज ऑफ लॉमध्ये शिक्षक दिन उत्साहात
तुषार थळे, प्रतिनिधी अलिबाग
गुरुंचा सन्मान अन् करिअरची नवी दिशा; ॲड. दत्ता पाटील कॉलेज ऑफ लॉमध्ये शिक्षक दिन उत्साहात
तुषार थळे, प्रतिनिधी अलिबाग
बिनधास्त न्यूज नेटवर्क
अलिबाग दि.०४ सप्टेंबर २०२६: जनता शिक्षण मंडळ संचलित ॲड. दत्ता पाटील कॉलेज ऑफ लॉ, अलिबाग येथे भारताचे माजी राष्ट्रपती, तत्त्वज्ञ व शिक्षणतज्ज्ञ डॉ. सर्वपल्ली राधाकृष्णन यांच्या जयंतीनिमित्त शिक्षक दिन गुरुवार, दि. ३ सप्टेंबर २०२६ रोजी उत्साहात साजरा करण्यात आला. दि. ५ सप्टेंबर रोजी गोपाळकाला उत्सव असल्याने शिक्षक दिनाचा कार्यक्रम ३ सप्टेंबर रोजी आयोजित करण्यात आला.
कार्यक्रमाचे उद्घाटन जनता शिक्षण मंडळाचे अध्यक्ष ॲड. डॉ. गौतम पाटील यांच्या हस्ते करण्यात आले. यावेळी डॉ. सर्वपल्ली राधाकृष्णन तसेच ॲड. दत्ता पाटील यांच्या प्रतिमेस पुष्पहार अर्पण करून अभिवादन करण्यात आले.
कार्यक्रमाचे आयोजन DLLE समितीचे प्रमुख प्रा. कौशिक बोडस आणि ग्रंथालय समितीचे प्रमुख प्रा. सुरज पुरी यांनी केले. कार्यक्रमाच्या आयोजनासाठी IQAC समन्वयक प्रा. नीलम जे. म्हात्रे यांनी मार्गदर्शन केले. कार्यक्रमाचे सूत्रसंचालन कु. परी कासार हिने केले.
शिक्षक दिनानिमित्त विद्यार्थ्यांनी शिक्षकांप्रती आदर व प्रेम व्यक्त करत महाविद्यालयातील प्राध्यापक आणि शिक्षकेतर कर्मचाऱ्यांचा पुष्पगुच्छ देऊन सन्मान केला. या उपक्रमातून विद्यार्थ्यांनी शिक्षकांप्रती असलेली कृतज्ञता आणि आदराची भावना व्यक्त केली.
कार्यक्रमाचे विशेष आकर्षण म्हणजे ‘कायद्याच्या क्षेत्रातील पर्यायी करिअरच्या संधी’ (Alternate Career Options in Law) या विषयावर विद्यार्थ्यांनी केलेले माहितीपूर्ण PowerPoint सादरीकरण होय.
विद्यार्थी प्रतिनिधी कु. आर्य पाटील, कु. आदित्य कांबळे, कु. आदित्य म्हात्रे, कु. स्वरूप म्हात्रे, कु. आर्या पाटील, कु. मनस्वी पवार, कु. श्रेया पाबरेकर इ. विद्यार्थ्यांनी PowerPoint Presentation द्वारे कायद्याच्या क्षेत्रातील करिअरच्या विविध वाटा उलगडल्या.
सादरीकरणामध्ये कायदेविषयक पत्रकारिता (Legal Journalism), सार्वजनिक क्षेत्रातील उपक्रम (PSU), RBI मधील कायदा अधिकारी (RBI Law Officer), सर्वोच्च न्यायालयातील लिपिक (Supreme Court Clerk), कॉर्पोरेट वकील (Corporate Lawyer) तसेच न्यायिक सेवा (Judiciary) या विविध पर्यायी करिअरच्या संधींची सविस्तर माहिती देण्यात आली.
कायदेविषयक पत्रकारिता या क्षेत्रात कायदे, न्यायालयीन निर्णय आणि कायदेविषयक घडामोडींचे लेखन व वृत्तांकन करण्याच्या संधींबाबत विद्यार्थ्यांनी माहिती दिली. PSU क्षेत्रात विविध सार्वजनिक उपक्रमांमध्ये कायदा अधिकारी व कायदेविषयक सल्लागार म्हणून काम करण्याच्या संधी स्पष्ट करण्यात आल्या.
RBI Law Officer या पर्यायातून बँकिंग, वित्तीय आणि नियामक कायद्याच्या क्षेत्रात काम करण्याच्या संधींबाबत माहिती देण्यात आली. तसेच Supreme Court Clerk म्हणून न्यायालयीन कामकाज, कायदेविषयक संशोधन आणि न्यायालयीन निर्णयांचा अभ्यास करण्याच्या संधींची माहिती विद्यार्थ्यांनी दिली.
Corporate Lawyer म्हणून कंपन्यांना कायदेविषयक सल्ला देणे, करारपत्रे तयार करणे व तपासणे, कंपनी कायदा आणि व्यावसायिक व्यवहारांशी संबंधित कायदेशीर बाबी हाताळणे याबाबत विद्यार्थ्यांनी मार्गदर्शन केले. त्याचबरोबर Judiciary या क्षेत्रात न्यायिक सेवा परीक्षेच्या माध्यमातून न्यायव्यवस्थेत प्रवेश करण्याच्या संधींचीही माहिती सादर करण्यात आली.
या सादरीकरणातून कायद्याचे शिक्षण केवळ वकिलीपुरते मर्यादित नसून कायदेविषयक पत्रकारिता, सार्वजनिक क्षेत्र, बँकिंग, न्यायालयीन संशोधन, कॉर्पोरेट क्षेत्र आणि न्यायिक सेवा अशा विविध क्षेत्रांमध्ये करिअरच्या संधी उपलब्ध आहेत, हा महत्त्वपूर्ण संदेश विद्यार्थ्यांना मिळाला.
प्रभारी प्राचार्य डॉ. नीलम हजारे यांनी विद्यार्थ्यांना मार्गदर्शन करत कायद्याच्या क्षेत्रातील विविध करिअरच्या संधींची उपलब्धता स्पष्ट केली. विद्यार्थ्यांनी आपल्या आवडी, क्षमता आणि कौशल्यांनुसार योग्य करिअरची निवड करावी, असे त्यांनी सांगितले.
या कार्यक्रमास प्रा. डॉ. संदीप घाडगे, प्रा. हर्षदा चेवले, प्रा. पियुषा पाटील, शिक्षकेतर कर्मचारी तसेच विद्यार्थी मोठ्या संख्येने उपस्थित होते. विद्यार्थ्यांनी सादर केलेल्या करिअरविषयक PowerPoint Presentation ला उपस्थितांनी उत्स्फूर्त प्रतिसाद दिला. शिक्षकांचा सन्मान आणि कायद्याच्या क्षेत्रातील करिअरच्या नव्या वाटांची ओळख करून देणारा हा उपक्रम उत्साहपूर्ण व ज्ञानवर्धक वातावरणात संपन्न झाला.
