तात्पुरता आधार आणि उसनं प्रेम
डॉ ज्ञानेश्वर माशाळकर ता उमरगा जिल्हा धाराशिव
तात्पुरता आधार आणि उसनं प्रेम
तात्पुरता मिळालेला आधार,
उसनं मिळालेलं प्रेम,
दोन्हींची सावली थोडी,
पण मनाला देतात भुलवणारा नेम…
आजच्या या युगामध्ये,
नातीही झाली आहेत व्यवहाराची,
हसताना जवळ येणारी माणसं,
वेळ आली की होतात दूर जाणारी…
गरज असेपर्यंत आपलेपणा,
गरज संपली की अनोळखीपणा,
शब्दांत असते प्रेमाची भाषा,
पण मनात नसतो जिव्हाळ्याचा ठेवा…
उसनं प्रेम कितीही गोड असलं,
तरी त्यात आपलेपण नसतं,
तात्पुरता आधार कितीही मोठा असला,
तरी तो कायमचा सहारा नसतो…
म्हणूनच आयुष्याच्या वाटेवर,
स्वतःच्या पायावर उभं राहावं,
खोट्या आधाराच्या कुबड्या सोडून,
स्वतःचं आभाळ स्वतःच गाठावं…
ज्यांचं प्रेम निःस्वार्थ असतं,
तेच आयुष्यभर सोबत राहतं,
बाकी जगाचं उसनं प्रेम,
वेळ आली की अलगद निघून जातं…
तात्पुरता आधार संपतो,
उसनं प्रेमही परत जातं;
पण स्वतःवरचा विश्वास ठेवला,
तर माणूस आयुष्यभर उभा राहतो!
डॉ ज्ञानेश्वर माशाळकर
ता उमरगा जिल्हा धाराशिव
