श्रावण सरी

श्रावण सरी

हिरव्या डोंगर माथ्यावरी
कोसळता श्रावण सरी
सांडला सप्तरंगाचा सडा
ती निखळ हासल्यावरी

गर्द झाडी नटली सारी
फुलपाखरे फेर धरी
मधमाशा पिंगा घालती
खळखळणाऱ्या झऱ्यावरी

विजांचा थयथयाट नभी
ढग नाचती वाऱ्यावरी
गंध मातीचा मनात आत
साठवून घ्यावा उरि अंतरी

धरणीच्या मुक्त अंगणात
मयूर नाचरा ताल धरी
पक्ष्यांच्या ईवल्या चोचीतून
स्वर छेडते बघ बासुरी

कोण बावरी अंगावरी
झेलते पावसाच्या सरी
थेंब घेते अलगद चुंबन
तीच्या निखळ गालावरी

इंद्रधनुच्या सप्तरंगात
नटली धरणी सारी
उन कोवळे पीवळे ढवळे
चमकते डोंगर शिरावरी

तृप्त होते धरणी माता
कोसळता सरिवर सरी
हर्षित होते माती सारी
दव थेंबाचे पाना फुलावरी

प्रकाश पुंडलिक गोधने
बाचोटीकर ता.कंधार जि.नांदेड
==========

0 4 8 2 9 0